Қазақстан Республикасы Президенті жанындағы Әйелдер істері және отбасылық-демографиялық саясат жөніндегі Ұлттық комиссия мүшелері – Шолпан Каринова, Лаура Карабасова, Жанат Шамакова, Ақтөбе облысы әкімі аппаратының гендерлік теңдік мәселелері жөніндегі кеңесшісі Күлпаршын Айдарханова, әйелдер істері және отбасылық-демографиялық саясат жөніндегі комиссия хатшысы – облыс әкімі аппаратының бас инспекторы Маржан Қорғанбаева Батыс Қазақстан медицина университеті Марат Оспанов атындағы КЕАҚ жанындағы Отбасылық медицина клиникасындағы «Самғау» жастар денсаулық орталығының қызметімен танысты.

Біздің орталықта 10 жастан 18 жасқа дейінгі кәмелетке толмағандарға және 35 жасқа дейінгі жастарға медициналық профилактикалық көмек, консультациялар мен ақпараттық қолдау көрсетіледі. Орталықтың негізгі мақсаты – жастар арасында салауатты өмір салтын қалыптастыру, репродуктивті денсаулықты сақтау және психологиялық көмек көрсету.

Комиссия мүшелері орталықтың материалдық-техникалық базасымен, мамандар құрамымен, жұмыс бағыттарымен және көрсетілетін қызметтерімен танысты. Жастардың репродуктивті денсаулығын сақтау және психологиялық көмек көрсету қоғам дамуының маңызды факторлары екендігі атап өтілді.

Жұмысты жетілдіру, қызмет көрсету сапасын арттыру және кең көлемді профилактикалық іс-шараларды жүзеге асыру бойынша ұсыныстар мен нақты шаралар талқыланды.