



Сүзгі кабинеті — клиникадағы жұқпалы ауру белгілері бар пациенттерді бастапқы тексеруден өткізетін арнайы орын. Оның мақсаты — инфекциясы бар адамдарды ерте анықтап, оқшаулау арқылы басқа пациенттерге таралуын болдырмау.
Медбике пациенттің температурасын, сатурациясын, қан қысымын өлшеп, шағымдарын тыңдап, жалпы жағдайын бағалайды. Қажет болса, анализ алып, дәрігерге немесе шұғыл көмекке бағыттайды.
Сондай-ақ, медициналық құжаттармен жұмыс жүргізіп, электронды жүйеге мәліметтер енгізеді. Санитарлық талаптардың сақталуын қадағалап, пациенттерге алдын алу шаралары мен дұрыс күтім жасау тәсілдерін түсіндіреді (мысалы, Регидрон ерітіндісін дайындау мен қолдану жолы).
Сүзгі кабинетінің жұмысы — клиникадағы эпидемиологиялық қауіпсіздікті қамтамасыз етудің маңызды бөлігі.